إيفا: لو زوجي اعترض على شغلي «مكنتش اتجوزته».. جورج سيدهم عرفني عليه
الفنانة إيفا
قالت الفنانة إيفا إنها تعرفت على زوجها من خلال مسرحية «أهلا يا دكتور»، حيث كانت أول عمل لها على المسرح، كما أن زوجها كان صديق جورج سيدهم، وهو من عرفه عليها، «بعد كده بقى يتابعني، لما كنا بنعرض في الإسكندرية كنا نلاقيه جاي في الإسكندرية ويجيلنا المسرح، نروح بورسعيد عشان نعرض نلاقيه جاي المسرح».
وأضافت «إيفا»، خلال حوارها في برنامج «السفيرة عزيزة»، مع الإعلامية شيرين عفت والإعلامية نهى عبد العزيز، على شاشة «DMC»، أنه بدأ بعد ذلك يعرض عليها الذهاب إلى بعض الأماكن في المحافظة التي يتم فيها عرض المسرحية، « كنا بنخرج وخلاص، الحكاية بدأت تتطور شوية شوية، بقى يعرف إيه أنا بحبه ويروح يعمله».
وأشارت الفنانة إلى أنها لم تكن تستوعب في البداية أنه يقوم بذلك من أجل الارتباط بها، «كنت حاسة إنه مهتم، وبيفكر، بس لحد ما قالي إنت تعملي بيت حلو، قلت له عرفت إزاي، قالي شخصيتك تعمل بيت جميل، ولو هتدي لبيتك هتديه من قلبك»، موضحة أن زوجها ليس هو وراء اختفائها من الساحة الفنية.
وتابعت: « لو جوزي كان معترض على موضوع الشغل، مكنتش اتجوزته من أصله، هو بذكائه فهم إن أهم حاجة عندي هي شغلي، وهو عارف إني عاوزة أخلف جدًا بس لما ألاقي الوقت مناسب، أنا اللي أقول عليه، وجوزي عمره ما يتدخل في شغلي بأي شكل من الأشكال، سواء حلو أو وحش، مع أنه كان كاتب، يعني لو جالي سيناريو هيفهم ده حلو ولا وحش ، بس كان خط أحمر إنه ييجي جنب شغلي».
وفي فقرة خاصة بالمطبخ، ذكرت الفنانة أنها تجيد طهي الحمام المحشي والخرشوف والمسقعة، « أنا مستغربة الناس بتاخد قلب الخرشوف بس وتحشيه وتعمله باللحمة المفرومة وبترمي القشر، رغم إن القشر مهم جدًا، ده فيه كل الحديد، الخرشوف مهم جدا للكبد، ليه ترموا القشر ده، خسارة».