لليوم الثاني.. عمال "نظافة بني سويف" يواصلون الإضراب عن العمل
![لليوم الثاني.. عمال](https://watanimg.elwatannews.com/old_news_images/large/313624_Large_20150212122810_15.jpg)
يواصل لليوم الثاني على التوالي، العشرات من عمال النظافة، في مدينة بني سويف، الاضراب عن العمل، احتجاجا على عدم تثبيتهم وتدني رواتبهم، التي لا تتعدى الـ500 جنيه شهريًا.
واعتصم العمال، داخل الجراج الخاص بهم في حي الحميات وسط المدينة، والتزم الباقي بالجلوس في الشارع بجوار مدرسة الهلال، لحين الاستجابة لمطالبهم.[SecondImage]
وقال محمود سعيد أحد العمال المضربين: "مرتبي لا يتعدى 500 جنيه شهريًا ومفيش أي زيادات ولا حوافز، ولو اتأخرنا يوم بيتحسب غياب ولو غبنا يوم بيتخصم أدامة يوم تاني ومعندناش مكافأت، والدنيا غلت من حولينا واحنا زي ما احنا، هنصرف مين ولا هنجيب منين، ولا هنتحرك من هنا إلا لما حقي ييجي، أنا شغال من 6 سنين وكل سنة بناخد وعد فيها بالتثبيت ورفع المرتبات ودا ما بيحصلش، ولاكأننا معندناش كرامة أو عيال صغيرة بيضحكوا علينا بكلمتين، عملنا مظاهرات كتير قبل كدة ووقفات احتجاجية، ومحدش بيسأل فينا ويجيلنا تهديدات أن الأمن هيقبض علينا، الحكومة عايزنا يا اما نشحت أو نسرق، واحنا ناس غلابة على أد حالنا ورانا بيوت مفتوحة وعايزين نأكلهم من الحلال وبكرامة".
وأضاف محمود سالم أحد العمال: " أنا ومراتي وبناتي الثلاثة ووالدتي بنصرف من الخمسمائة جنيه، علاج ومدارس والأكل والإيجار، طب ازاي يا حكومة، بضطر أزوغ من الشغل في آخر اليوم وأروح اشتغل في حتة تانية شيال عند الناس، وأسد حاجة بيتي، وأجي تاني يوم ألاقي الأفندي بتاعنا واخدني غياب ويتخصم من المرتب، وبقينا مش عارفين نقعد ولا نمشي أو حتى نشتغل شغلانة تانية، حرام اللي بيحصل معانا دا، عايزين نعيش زى الناس حياة كريمة نشتغل ونقبض على اد شغلنا وعرقنا، احنا مش بنطالب بأكثر من حقنا، التثبيت ورفع المرتبات زينا زي الموظفين".
وأضاف عبدالحميد محمود:" طول اليوم بنرفع في زبالة وننضف في الشوارع واحنا مبسوطين بكدة وبنأدي عملنا بجد وإجتهاد، لازم يبقى فيه مقابل للعمل يكفينا أو على الأقل نبقى زى باقي الناس، أنا من 7 سنوات ومرتبي زي ما هو غير قابل للزيادة، إنما قابل للخصم ودا بنبقى معرضين لية في أي وقت مع أي ظروف، وطبعا ملناش في العلاج ولا الحوافز أو إجازات غير يوم واحد في الأسبوع، ولو حد فينا أصيبة بمرض بيأخد الإجازة على حسابة، والمشكلة دي مش عندنا بس دي فى كل مشاريع النظافة في المحافظة.[ThirdImage]
وقال اللواء محمد حسين كامل، رئيس مشروع النظافة ببني سويف، في الفترة الأخيرة قمنا بتثبيت أكثر من نصف العاملين، وتم اختيارهم بناء على الأقدمية ويتقاضون الحد الأدنى، وتبقى النصف الآخر الذي قمنا بإرسال أوراقه لجهاز التنظيم والإدارة لتثبيت مجموعة أخرى منهم، وتواصلنا مع العمال المضربين وحاولنا ٌإقناعهم أكثر من مرة إن إدارة المشروع أرسلت أوراقهم، وهناك مجموعة من الإجراءات التي يجب إتباعها، لكن يوجد البعض الذي يندس بينهم لإقناعه بعكس ذلك، لافتًا إلى عدم وجود مصلحة لإدارة المشروع في عدم تثبيتهم، أو إجراء عقود شاملة لهم.