الشيخ أمين
م الشوارع للشوارع..
بندهك
تدهن وشى فرحة..
وتدوب معايا
فـ لون الحياة
نزرع غناوى العطشانين
لصدق العيون
أصل الخيانة..
طبع البشر
وانا وانت مستنيين..
من زمان
للشيخ أمين
يقرا المعوذة وتبت يدا
نلقى القلب ساعتها اهتدى
وفدادين الحزن صبحت براح
قبل الصباح
يرجع طابور المدرسة
ونشيد بلادى
وشوارع بتغسل وشها
من زفير الضباب
وقرش فـ جيب المريلة..
وفرحة أول يوم دراسة
وأبلة ناهد..
وأستاذ صلاح
فدادين الحزن تصبح براح
من ملايات السرير..
اغزل علم
وادهن شوارع المدينة
بلون فرحتى
يدق الجرس
تطرح شوارع المدينة
مرايل
تحضنّا الشوارع
لحد البيوت
تاخدنا الحكاوى
نكبر فـ لحظة..
نعجز نموت